Emakume izanda adikzio-problemak izateak arbuio bikoitza sortzen du. Errealitate horren aurrean, profesionalek badakigu emakumeak adikzioa garatuago dagoenean jotzen dutela tratamendura, laguntza bilatzera, egoera ekonomiko eta soziolaboral okerragoan, familia-karga gehiagorekin eta laguntza gutxiagorekin. Beraz, laguntza eskatzea zailagoa eta gogorragoa egiten zaie emozionalki, eta errua, lotsa eta baztertua sentitzeko beldurra sortzen ditu.
Sozializazio-prozesuan hainbat faktorek dute eragina, eta horien artean familia dago, muin-muinean, lehenbizikoa. Familia gizarte-egituraren parte da, eta emakumeentzat egokia denari edo ez denari buruzko aginduak, aurreiritziak eta estereotipoak ditu. Gure familiako emakume batek, gure lagun batek, bere kontsumoaren edo joko-problemaren berri ematen digunean, beste “oihartzun” batzuk aditzen ditugu, erronka horri aurre egiteko gehitutako oztopo bat gehiago, zailtasun bereziak sortzen dituztenak konponbidea bilatzerakoan.
Zuentzat, ahaideentzat eta lagunentzat, laguntza eskatzea ere ahalegin bikoitza da. Horrek anbibalentzia bat sortzen du: batetik, badakizu zure alabak, arrebak, ahizpak edo bikotekideak laguntza profesionala behar duela, baina, aldi berean, gizartearen aurrean ere egin behar zaio aurre egoerari.
Emakumeak laguntza eskatzea, beraz, urrats handia da. Horrek guztiak berekin dakar emakumeak, familiak eta lagunek estigma sozial handi bati egin behar diotela buru. Prozesu honetan lagunduko dizuegun emakumeok zuei entzuteko, ulertzeko eta bide horretan sostengua emateko prest gaude, eta arreta indibidualizatua eskainiko dizuegu familiaren edo taldearen behar espezifikoei ere heltzekoz.
Lagundu dezagun emakumeak berak ere beren aldaketaren eragile izan daitezen!
Testigantzak
31 urte. Arrosa
"Taldean hasi nintzenean, uste nuen dena nekiela, nire bizitzaren parte batzuk onartzeko beldurrez. Bertan nengoela, negar egin ahal izan nuen, irri egin, haserretu, konpartitu, isilik egon hala behar izanez gero, zuen konpainiari esker egunez egun zerbait ikasiz, eta geure iraultza bat hasi genuen elkarri lagun eginez. Eskerrik asko elkarrekin sortutako espazioagatik, beti eramanen dut nire aldean, nirekin."
55 urte. Maritxu
"Nire kasuan, bizitza eta pentsamendua aldatzea ekarri du. Programa ongi egiten duzue, egoki, eta horregatik funtzionatzen du. Eskerrik asko bihotz-bihotzez. Zoragarriak zarete"
64 urte. Margarita
Niretzat zuen babesa oso garrantzitsua izan da. Niri gauza nintzela esan izanak asko lagundu zidan: errudun ez sentitzeko baldin eta berriz erortzen banintzen, taldeak emandako animoak (terapeuta, medikua). Pozok nago, esker ona besterik ez zait ateratzen. Ohartu naiz kontsumitu gabe goza dezakedala.
62 urte. María
Emakume guztiak ausartu beharko lirateke probatzera. Maitasun eta interes handia jaso dut. Emakume terapeuten konpromisoa ikaragarria iruditzen zait.
51 urte. Carmen
Oso ideia ona da emakume talde bat egotea, emakumeen problematikarekin lotutako gai espezifiko asko baitaude gizarteari dagokionez.
43 urte. Ainara
Zuen zerbitzuetatik pasatzeak bizia salbatu dit. Mila-mila esker.
58 urte. Elisa
Eskerrik asko emakume terapeuta guztiei eman didazuen tratuagatik, denengandik ikasi dut zerbait. Uste dut oso profesionalak zaretela.
49 urte. Coro
Ez dut sentitu inolako premiarik ase gabe. Jarraitu ezazue jendeari laguntzen.
60 urte, Pilartxo
Lehenago, ongi sentitzeko edaten nuen. GH proiektuan, ongi sentitzeko ez edatera erakutsi didate. Lehen ez nekien zergatik edaten nuen, orain badakit zergatik ez dudan edaten.
44 urte, Vicky
GH proiektuan egoteak autoestimua handitu dit, sartu aurretik ez bainuen maite neure burua. Kontsumitzen jarraitu izan banu, hil eginen nintzen edo orain espetxean egonen nintzateke. Bizitza itzuli didazue.
33 urte, Paula.
“Aldatu” programara etortzea lagungarria izan zait da neure burua ezagutzeko eta neure burua zaintzen ikasteko.
Ezin nuen ongi pasatu drogatu gabe, parranda egitea drogarekin nuen lotua, hori zen nire mundu bakarra. Orain planak egiten ditut, neure buruaren jabe naiz eta horrela bideratzen dut nire bizitza.
61 urte, Elena
Poz-pozik nago esperientziarekin. Prozesu osoan zehar laguntza eta sostengua dituzu, zure buruari ulertzen ikasten duzu. Hori bai, ez duzu izan behar ez beldurrik ez lotsarik.
40 urte, Uxue
Dena galdu nuen, bai: lana, familia, dena Baina ez da garrantzitsuena zer galdu nuen, baizik eta orain zer irabazi dudan.
Jende zoragarriari esker, neure burua ezagutu dut, uste ez bezalako pertsona bat, bizitzeko gogoa duena, bizi-poza berreskuratu duena.
Gizarte Helburu proiektuaren Aldatu programaren talde bikain eta langileari esker, neure buruaren jabe naiz orain. Mila esker.
